الطموح ابدا لا يموت

بعد ممارستها مهنة الصيدلة لمدة  23   عاما، د. مني علي⁦❤️⁩ رجب تصبح مدرس مساعد في كلية الفنون الجميلة. هذه هي قصتها كما ارسلتها د. مني رجب😍

اهلي زمان مرضوش يدخلوني كلية فنون جميلة، وغلطتي إن انا كنت جايبة مجموع كبير يدخلني طب كمان، وفنون جميلة كانت بتاخد وقتها 50%، و ده كان بالنسبة لهم مينفعش، لأنها وقتها لم تكن من كليات القمة زي دلوقتي، و رفضوا تماما وقرروا يدخلوني صيدلة. ودخلت صيدلة غصب عني ولقيتني بجيب جيد وبذاكر، بس من غير نفس، وفضلت مستمرة على كده وخلاص، وخلصت دراسة واشتغلت وتزوجت، وزوجي جابلي صيدلية واشتغلت فيها 23 سنة.

عرفت سنة 2005 إني اقدر ادخل فنون جميلة بالبكالوريوس.  زوجي كان يعرف دكتور شاكر وكلمه عني وإني برسم في كل مكان على الحيطان وعلى الشبابيك. وطلب د. شاكر يشوف شغلي، ودخلت امتحان القدرات ونجحت ودخلت طالبة مش تعليم مفتوح، يعني كان تعليم عادي، وكنت بأحضر المحاضرات مع الطلبة الصغيرين اللي معايا. ومن اول يوم في الدراسة تحكم فيا الشغف؛ 45 سنة شغوفة للفن وكنت عايزه معلومات بس، يعني ايه لون سخن؟ يعني ايه لون بارد؟ الحاجات اللي بسمعها دي هتجنن واعرف ايه معني الكلام اللي بسمعه ده. وكنت بنزل اجيب لوحات و الوان زيت و اجرب مع نفسي.

وفي كلية الفنون الجميلة، 🎓كل سنة كنت بجيب امتياز واتخرجت عام  2010، والحمد لله طلعت الأولى، وكان سني وقتها  51 سنة. سني مكانش مشكلة بالنسبة للفن والناس، بس المسؤولين كان ليهم رأي تاني، وقالوا إن عمرها ما حصلت، ومينفعش إن معيدة تكون عندها 51 سنة، ده كان شئ غريب، لكن من الممكن نتخطاها، وناخد اللي وراها، مع إن الفرق كان بيني وما بينه 122 درجة، مش نص او ربع درجة. والقانون مكنش فيه مشكلة تخليني انسحب او ابعد عن الموضوع، بالعكس ده عملي اصرار اكتر إني اكون عميدة.

 ورفعت قضية وكملت في الموضوع، ⁦⚖️⁩وجالي التعيين📜 للعشرة الأوائل في الكلية واشتغلت مساعدة لدكتور شاكر و موظفة لمدة 3 سنوات، وكنت في نفس الوقت بخلص الماجستير. و الحمد لله كسبت القضية واتعينت مدرس مساعد واخدت الماجستير والشئ اللي محصلش قبل كده إن في خمس سنين بعد تخرجي كنت مخلصة ماجستير و دكتوراه، ومستشار الجامعة قالي إن ده شئ غريب في الوقت ده واني اول مرة حد يعمل كل ده في مدة 5 سنين. واستنيت سنة كمان عشان اخد الترقية عشان لازم يمر 6 سنين على التخرج لأخذ ترقية وظيفة مدرس.

الحمد لله حالياً أنا مدرس في الجامعة،⁦👩‍🏫⁩ و بدرس مادة لإعدادي، فنون عام (تصوير)،📷 و ماسكة مديرة وحدة الجودة في الكلية،  ده غير نشاطاتي خارج الكلية زي عملي في المجلس القومي للمرأة، و نادي لاينز، وشغل تطوعي للمجتمع، وده كمان غير شغلي في جمعية محبي فن محمد شاكر و مجلة الزمكان.

⁦🎙️⁩عايزة اقولكم⁦🗣️⁩ارضوا بأي حاجة، اشتغلوا اي حاجة متاحة بعد التخرج،  بس اعرفوا انها فترة مؤقتة في حياتكم، و تخلوا في هدف كبير قدامكم واشتغلوا علشان توصلوا له. ادرسوا كويس واعملوا علي تطوير نفسكم، وخدوا كورسات وخدوا لغات 

... امشوا في سكة الحاجة اللي بتحبوها⁦❤️⁩ لغاية لما تنفذوها.