فكرة للصدقة ودعوه حلوة
من فترة طويلة يمكن من ايام الاعداديه و انا اتعودت
كل ما أكون فى كرب او اشوف حد ف كرب او صديق مهموم او حد بحبه عنده مشاكل اني أعمل إطعام 😊
الموضوع سهل و مش سهل
الظروف بقت صعبة و الناس علي طول في ابتلاءات و اختبارات و عارفة إن أحب الاعمال عند ربنا الاطعام
طيب ورانا ايييه ؟؟
الموضوع بسيط و هشرحه بالتفصيل
انا لما بحب حاجة بحب انشر فكرتها🌹
و اوصلها للناس لعلها تبقي القشاية ... اللي تفيدني يوم ما اقف بين ايديه ..يقولي انتي دليتي حد علي فعل الخير
ينفعني و ينفع غيري و زي ما الواحد بينزل نكت و تهريج
عادي جدا إنه ينزل فكرة او تجربة ( عمرها ما هتخيب و تجارة رابحة )
انا بعمل دايما الاطعام ب أكله إسمها رغيف الفتة 🙋
من تأليفي و اختراعي
عشر فرخات بلدي صغيرين ب ٥٠٠ جنيه
٤٠ رغيف بلدي من فرن عادي ب ١٥ جنيه
٥٠ جنيه رز و لسان عصفور
نص كيلو اكياس سندوتشات بلاستيك ٢٠ جنيه
قطعي الفراخ كلها اربع و تبليها ملح و فلفل و ورق لاورا و اغسليهم بالدقيق و الخل و ظبطيهم
بسلق الفراخ ف ماية مغلية و معاها و بصل وملح و فلفل
باخد الفراخ احطهم ف صينية
و اعمل رز ابيض ( ١٠٠٪ معمول بمرقة الشوربة اللي سلقتها )
اعمل صلصة الفتة و و ادهن الفراخ بيها و ادخلها الشواية تاخد وش حلو كده و جميل
افتح كل رغيف و احط فيه الرز و ربع فرخة و احطه ف كيس بقت وجبه متكاملة👌👌
بيتفضل شوربة كتييير جدا
بعمل بيها لسان عصفور و احطهم ف برطمانات الحاجات اللي خلصت ( برطمانات صلصة بقه او اي حاجة بدل ما تترمي ) و معاهم معلقة بلاستيك
خلصت تحضير ، شد حيلك و انزل ابتدي وزع
تعرف حد ... روحله
متعرفش .... انزل قدام المستشفيات الحكومي اهالي العيانييين بيبقوا واقفين تحت و بايتين ع الرصيف نفسهم ف وجبة سخنة
قدام مشرحة زينهم بين السيدة عيشة و السيدة زينب
الناس بتبقي قاعدة مستنية و عندهم فوق الهم هم و منسيين و اصحاب النصيب اللي بيطلعوا من غير ترتيب هتقابلهم هتقابلهم
ال اربعين شخص هيكلفوك كام ؟؟؟
٦٠٠ جنيه
عارف ال ٦٠٠ جنيه دول ؟؟ دول اللي بيتجاب بيهم ٢ بيتزا حجم متوسط...يأكلوا فردين
هتعرف تأكل بيهم ٤٠ شخص وجبه فيها كل العناصر الغذائية و زود براحتك بقه و حط التاتش بتاعتك 🌹
قال تعالى: {وَيُطْعِمُونَ الطَّعَامَ عَلَى حُبِّهِ مِسْكِينًا وَيَتِيمًا وَأَسِيرًا * إِنَّمَا نُطْعِمُكُمْ لِوَجْهِ اللَّهِ لا نُرِيدُ مِنْكُمْ جَزَاءً وَلا شُكُورًا * إِنَّا نَخَافُ مِنْ رَبِّنَا يَوْمًا عَبُوسًا قَمْطَرِيرًا * فَوَقَاهُمُ اللَّهُ شَرَّ ذَلِكَ الْيَوْمِ وَلَقَّاهُمْ نَضْرَةً وَسُرُورً} [الإنسان:8-11].عبوساً: تعبِس فيه الوجوه. وقمطريراً: شديداً.
وقال صلى الله عليه وسلم: «أَحَبُّ الأَعْمَالِ إِلَى اللَّهِ سُرُورٌ تُدْخِلُهُ عَلَى مُسْلِمٍ ، أَوْ تَكْشِفُ عَنْهُ كُرْبَةً ، أَوْ تَطْرُدُ عَنْهُ جُوعًا ، أَوْ تَقْضِي عَنْهُ دَيْنًا» (صحيح الجامع).
عن عبد الله بن عمرو بن العاص رضي الله عنهما أن رجلا سأل رسول الله صلى الله عليه وسلم: أي الإسلام خير؟ قال: «تُطْعِمُ الطَّعَامَ وَتَقْرَأُ السَّلَامَ عَلَى مَنْ عَرَفْتَ وَمَنْ لَمْ تَعْرِفْ» (متفق عليه).
{أَوْ إِطْعَامٌ فِي يَوْمٍ ذِي مَسْغَبَةٍ؛ يَتِيمًا ذَا مَقْرَبَةٍ؛ أَوْ مِسْكِينًا ذَا مَتْرَبَةٍ؛ ثُمَّ كَانَ مِنَ الَّذِينَ آَمَنُوا وَتَوَاصَوْا بِالصَّبْرِ وَتَوَاصَوْا بِالْمَرْحَمَةِ؛ أُولَئِكَ أَصْحَابُ الْمَيْمَنَةِ} [البلد:14-18]
:قال رسول الله صلى الله عليه وسلم: «ثلاثةٌ لا يكلمُهم اللهُ ولا ينظرُ إليهم يومَ القيامةِ ولا يزكيهم ولهم عذابٌ أليمٌ: رجلٌ على فضلِ ماءٍ يمنعُه ابنَ السبيلِ فيقولُ اللهُ له يومَ القيامةِ: اليومَ أمنعُك فضلي كما منعتَ فضلَ ما لم تعملْ يداك.....الحديث» (رواه البخاري ومسلم).
كل دي و اكتر آيات و أحاديث صحيحة بتقول فضل إلاطعام اللي هياخد منك وقت قليل بس جميل 🙂
بعد كل كام خروجة جمع من اصحابك اي مبلغ
كل اول شهر اتفق مع أهلك
الجيران اللي ف عمارتك او الشارع بتاعك
اهالي اصحاب ولادك ف المدرسة
لو خمسين جنيه علي خمسين جنيه
اتجمعوا بشكل دوري.. وكل مرة حد يطبخ
الموضوع هيبقي سهل و انت هتتبسط اكتر منهم
احنا اللي محتاجين الدعوة الحلوة اللي هتسمعها اكتر ما هما محتاجين الاطعام
Post a Comment